Ministria e Shëndetësisë në Maqedoninë e Veriut ka bërë të ditur se Stojançe Stefanov, 23 vjeç nga Koçani, ka ndërruar jetë sot paradite në Akademinë Ushtarake Mjekësore në Beograd, si pasojë e plagëve të marra gjatë zjarrit tragjik në diskotekën “Pulse”.
Stefanov kishte pësuar djegie të rënda në 27 për qind të trupit dhe dëmtime të rënda nga thithja e tymit.
Ai kishte qëndruar në gjendje kritike për më shumë se një muaj, duke qenë i intubuar dhe i lidhur me aparaturën ECMO – një pajisje që oksigjenon gjakun jashtë trupit në raste të rënda respiratore.
Mjekët kishin kryer një ndërhyrje kirurgjikale më 4 prill, por për shkak të natyrës së rëndë të plagëve, gjendja e tij mbeti e paqëndrueshme deri në fund.
Ministria shprehu ngushëllime për familjen e Stefanovit dhe për të gjithë të prekurit nga tragjedia në Koçan.
Zjarri në diskotekën “Pulse” shpërtheu mëngjesin e 16 marsit, gjatë një koncerti me mbi 500 pjesëmarrës.
Mjetet piroteknike që u ndezën në ambient të mbyllur shkaktuan përhapjen e shpejtë të flakëve, duke sjellë një bilanc tragjik me dhjetëra të vdekur dhe mbi 150 të plagosur. Hetimet për rrethanat e ngjarjes janë ende në vijim.
