Operacioni për kërkimet dhe nxjerrjen e trupit të peshkatarit të mbytur në rezervuarin e Bradomirës, ndërpritet përkohësisht.
Mësohet se ekipi i polumbarëve e ka pasur të pamundur të vijojë kërkimet pasi temperaturat e ujit të rezervuarit janë ekstremisht të ulëta.
Raportohet për ‘balkanweb’ se polumbarët po diskutojnë për të gjetur mënyra të tjera për të nxjerrë trupin e Ramazan Kojtarit.
Sipas tyre, trupi i viktimës mendohet të jetë në thellësi të rezervuarit, në distancë rreth 50 metra nga bregu.
Familjarët e Kojtarit kanë bërë apel për nxjerrjen sa më parë të trupit të viktimës.
Kujtojmë që pasditen e djeshme u mbytën në këtë rezervuar Ramazan Kojtari dhe Arben Pupa të cilët ishin banorë të zonës dhe administronin këtë rezervuar. Ata dilnin për peshkim pasi hidhnin rasatin e peshkut për shumim.
Dyshohet se shkak mund të jetë mbingarkesa në varkë pasi brenda saj ndodhej një sasi e madhe peshku.
