Në “Vendin e Dëshmisë dhe Kujtesës” në Shkodër është çelur një ekspozitë që ndriçon fatin tragjik të figurave të shquara shqiptare, të cilët ndërtuan themelet e gjuhës shqipe dhe më pas u persekutuan nga regjimi komunist.
Ekspozita, me titullin “Persekutimi komunist i hartuesve të alfabetit shqip dhe familjarëve të tyre”, sjell në fokus historinë e harruar të personaliteteve si At Gjergj Fishta, Mithat Frashëri, Lef Nosi dhe shumë të tjerë.
Drejtuesi i muzeut, Pjerin Mirdita, theksoi se: “Trajton përndjekjen që kanë pësuar të gjithë ata persona që kanë qenë të angazhuar në hartimin e alfabetit shqip. Janë figura të ndritura të historisë shqiptare. Të mos harrojmë se Lef Nosi është ekzekutuar me pushkatim, bashkë me At Anton Harapin dhe Maliq Bushatin. E njëjta gjë ndodhi edhe me At Gjergj Fishtën.”
Historianët shpjegojnë se, përveç dhunës fizike, regjimi komunist u përpoq të zhdukte çdo gjurmë të tyre nga kujtesa kolektive, duke retushuar fotografi dhe falsifikuar dokumente historike.
Një përfaqësues i ekspozitës theksoi: “Shumë foto janë retushuar duke i eliminuar këta persona nga momentet historike në të cilat ata ishin të pranishëm. Po ashtu, dokumente zyrtare janë tjetërsuar. Me ardhjen e komunizmit, gjithçka, sipas tyre, duhej të niste nga viti zero. Historia, sipas ideologjisë së tyre, ishte vetëm ajo që shkruhej prej tyre. Pasojat e kësaj Shqipëria i ndjen edhe sot.”
Ekspozita është organizuar nga Instituti i Studimit të Krimeve dhe Pasojave të Komunizmit në bashkëpunim me Universitetin “Luigj Gurakuqi” të Shkodrës dhe po tërheq interesin e qytetarëve dhe turistëve që vizitojnë qytetin.
