Italia renditet si vendi i dytë në botë me numrin më të madh të viktimave nga koronavirusi, pasi SHBA përveç të infektuarve, ka edhe numrin më të lartë të viktimave, që deri tani është 26, 200.
Përtej Adriatikut tragjedia “COVID-19” ka marrë 21, 067 jetë njerëzish dhe ka infektuar 162,488 persona, duke shënuar kështu periudhën më të errët të italianëve, që pas Luftës së Dytë Botërore.
Disa ditë më parë qeveria italiane njoftoi ndryshimin e strategjisë për luftën ndaj COVID-19, duke miratuar një plan me 5 pika:
- Distancim social,
- mjete mbrojtëse për të gjithë spitale COVID në të gjithë territorin kombëtar,
- përforcim i rrjeteve shëndetësore lokale,
- studim për të kuptuar sa janë prekur dhe
- një aplikacion, si modeli i Koresë së Jugut, për të verifikuar kontaktet e personave të infektuar.
Së fundmi, komisioneri për emergjencën e koronavirusit në Itali, Domenico Arcuri, tha se ishte autorizuar nga qeveria për të filluar kryerjen e testimeve serologjike në një mostër prej 150 mijë personash të identifikuar në shkallë kombëtare dhe të ndarë sipas profilit të punës, gjinisë dhe grupmoshave.
Sipas ANSA, në Rajonin italian të Toskanës do të kryen 400 000 teste serologjike, ku 140,000 teste janë të rezervuara kryesisht për punonjësit e shëndetit, kurse tani me përfshirjen e laboratorëve privatë totali i testeve arrin në 400,000.
Kreu i rajonit tha se po përballen me iniciativën më të madhe të kontrollit masiv që është hasur ndonjëherë në Itali dhe shtoi se deri tani në Toskana janë bërë më shumë se 80 mijë teste tamponi.
Testi serologjik i imunitetit ose testi gjakut mund të zbulojë praninë e antitrupavë që verifikojnë nëse jemi të infektuar ose jo.
Sipas ekspertëve, kështu mund të identifikojnë se kush është i infektuar dhe të identifikojnë ata që nuk kanë simptoma pa pasur nevojë për provat e një shtupë pozitive, duke bërë që kjo mënyrë të konsiderohet një element themelor në luftën kundër koronavirusit.
