Mjeku i njohur onkolog Shahin Kadareja, vëllai i shkrimtarit të njohur Ismail Kadare është ndarë nga jeta orët e para të mëngjesit të sotëm, pas një betejë gati njëvjeçare me një sëmundje të rëndë.
Ka qenë vajza e mjekut Kadare që ka konfirmuar lajmin e hidhur përmes një postimi në “Facebook”, ku njofton miqtë dhe të afërmit se ceremonia e varrimit do të zhvillohet ditën e sotme në orën 15:00.
“Me hidhërim njoftojmë ndarjen nga jeta të të dashurit tonë Shahin Kadare. Varrimi bëhet ditën e enjte, dt 18. 11. 2021, ora 12.00 në Tufinë.
Ceremonia mortore do të zhvillohet në ambientet e Funerale Home ALBA 2000, rruga e Dibrës, Nr. 302, pranë Medresesë, të mërkurën ora 15.00- 20.00 dhe të enjten ora 9.00- 12.00.
Vizitat do të zhvillohen ditën e premte deri të dielën, paradite nga ora 10.00 – 13.00 dhe mbasdite nga ora 16.00 – 20.00 në ambjentet e Piazza”, shkruan vajza e të ndjerit.
Kryetari i Partisë Demokratike, Lulzim Basha ka reaguar në lidhje me ndarjen nga jeta të doktor Shahin Kadaresë, njëherësh vëllai i shkrimtarit Ismail Kadare. Përmes një mesazhi, Basha teksa ka vlerësuar figurën e Shahin Kadaresë, theksoi se ai ka dhënë një kontribut të madh në fushën e mjekësisë.
Sipas Bashës, identiteti intelektual i Shahin Kadarese është garancia që shoqëria jonë do të ketë fuqi të nxjerrë gjithmonë garantë të vlerave politike, njerëzore, dhe profesionale.
“Me hidhërim të madh mësova lajmin e ndarjes nga jeta të doktor Shahin Kadaresë. Përveç se një mjek me kontribute të pashlyera në fushën e tij, doktor Shahini do të mbetet në memorien e Shqipërisë si pjesë e atyre intelektualëve guximtarë që në Dhjetor të vitit 1990 ndryshuan historinë e vendit. Edhe më ai pas nuk rreshti së qenuri një mendje e ndritur kritike, antikonformist, dhe një profesionist i shkëlqyer në fushën e mjekësisë, duke nderuar emrin e madh të familjes së tij. Identiteti intelektual i Shahin Kadarese është garancia që shoqëria jonë do të ketë fuqi të nxjerrë gjithmonë garantë të vlerave politike, njerëzore, dhe profesionale. I përjetshëm qoftë kujtimi i tij.”, shkruan Basha.
