Ditën e sotme ndërroi jetë Ish-deputeti i legjislaturës së parë të Kuvendit të Shqipërisë pas pluralizmit politik, Ndue Totri, si pasojë e një sëmundjeje të rëndë.
Menjëherë pas këtij lajmi ka reaguar edhe kryeparlamentari Gramoz Ruçi i cili nëpërmjet një letre ka ngushëlluar familjarët e ish-deputetit Totri.
Në letrën dërguar familjarëve Ruçi shkruan se lajmin e ndarjes nga jeta e mori me trishtim duke shtuar se ishte një nga inxhinierët dhe specialistët e shquar të Shqipërisë, që ia kushtoi jetën Shqipërisë, Mirditës dhe njerëzve.
Gjithashtu Ruçi shkruan se Nduen do ta kujtojmë me dhimbje, mall e respekt të thellë “për shërbimet që i ka bërë Mirditës së tij të dashur dhe të gjithë Shqipërisë, ekonomisë, shoqërisë, komunitetit, minatorëve, qytetarëve dhe të gjithë atyre me të cilët ka ndarë përkushtimin dhe sakrificat e tij për Shqipërinë”.
Letra ngushëlluese nga RUÇI:
Kryetari i Kuvendit, z. Gramoz Ruçi, letër ngushëllimi familjarëve të ish deputetit Ndue Totri
Kryetari i Kuvendit, z. Gramoz Ruçi, u ka dërguar sot një letër ngushëllimi familjarëve të ish deputetit Ndue Totri
“Me dëshpërim mora lajmin e hidhur për ndarjen e parakohshme nga jeta të Ndues, bashkëshorti, babait, vëllait dhe njeriut tuaj të shtrenjtë dhe ish kolegut tonë të dashur deputet të Kuvendit të Shqipërisë.
Ndue Totri është një nga inxhinierët dhe specialistët e shquar të Shqipërisë, që ia kushtoi jetën Shqipërisë, Mirditës dhe njerëzve.
Kudo ku shërbeu si inxhiner në industrinë minerale, si funksionar publik në niveletet lokale e qendrore, dhe si deputet i Kuvendit të Shqipërisë gjatë legjislaturës 1991-1992, është shquar për profesionalizmin e spikatur, përkushtimin e lartë, shpirtin e madh dhe zemrën e gjerë.
Nduen do ta kujtojmë me dhimbje, mall e respekt të thellë për shërbimet që i ka bërë Mirditës së tij të dashur dhe të gjithë Shqipërisë, ekonomisë, shoqërisë, komunitetit, minatorëve, qytetarëve dhe të gjithë atyre me të cilët ka ndarë përkushtimin dhe sakrificat e tij për Shqipërinë.”, shkruhet në mesazhin e ngushëllimit të Kryetarit të Kuvendit, z. Gramoz Ruçi.
