Tenori i njohur Dhimitër Dushi, një nga figurat më të spikatura të skenës shqiptare, është ndarë sot nga jeta pas një beteje të gjatë me një sëmundje të rëndë.
Ai lindi më 7 tetor 1947 në lagjen historike Mangalem të Beratit dhe la pas një trashëgimi të pasur në muzikën klasike, të lehtë dhe popullore shqiptare.
Pas diplomimit në Institutin e Lartë të Arteve në vitin 1976, Dushi filloi karrierën në Estradën Profesioniste të Beratit, ku u bë një emër i dashur për publikun.
Më vonë, me hapjen e shkollës artistike “Ajet Xhindole”, ai u angazhua si mësues kantos, duke udhëhequr breza të rinj këngëtarësh deri në pension.
Kontributi i tij në muzikë është i jashtëzakonshëm: mbi 600 interpretime që përfshijnë arie nga repertori botëror, këngë të muzikës së lehtë dhe më vonë edhe këngë popullore beratase.
Ai mori pjesë në 8 Festivale Kombëtare të Këngës në RTSH, festivale folklorike në Gjirokastër, aktivitete të këngës qytetare dhe turne ndërkombëtare në shumë vende të Evropës dhe rajonit.
Edhe pas daljes në pension, Dhimitër Dushi nuk e la kurrë skenën. Zëri i tij vazhdoi të emocionojë publikun në çdo ngjarje kulturore ku ishte i ftuar, duke dëshmuar pasionin e pashtershëm për artin.
Për veprimtarinë e tij të shquar është dekoruar me Medaljen “Naim Frashëri” nga Presidiumi i Kuvendit Popullor dhe mban titullin “Qytetar Nderi” i Beratit, si vlerësim për kontributin e jashtëzakonshëm në kulturën shqiptare.
