Regjisori, aktori dhe skenaristi shqiptar, Leka Bungo, është ndarë nga jeta këtë të martë në moshën 81-vjeçare.
Homazhet për figurën e tij do të mbahen të mërkurën, më 11 qershor, në orën 16:00, ndërsa prehja e tij e fundit do të bëhet në varrezat e Sharrës.
Lajmin për ndarjen nga jeta e kanë bërë të ditur familjarët përmes rrjeteve sociale.
Leka Bungo lindi më 28 shkurt 1944 në Vlorë dhe për dekada me radhë kontribuoi në zhvillimin e artit shqiptar, sidomos në teatër, film dhe televizion.
Ai u diplomua në shkollën për aktorë “Aleksandër Moisiu” dhe ndoqi më pas një kurs regjie në Institutin e Lartë të Arteve.
Karriera e tij nisi në teatrin “Bylis” në Fier dhe më pas vijoi në Estradën e Shtetit, ku solli në skenë vepra me temë sociale dhe humor kritik.
Pas viteve ’90, Bungo themeloi teatrin privat “Rubairat” pranë Teatrit Kombëtar, një nismë që kërkonte të sillte frymë të re në skenën artistike shqiptare, por që nuk pati jetë të gjatë.
Në vitin 2002, ai emigroi në Shtetet e Bashkuara, ku vazhdoi të ruante lidhjen me artin dhe krijimtarinë.
Ndër veprat e tij më të njohura janë dramat dhe skenarët si “Pabesia” dhe “Pas fasadës”, ndërsa publiku e kujton edhe për rolin e Bardhylit në filmin “Një djalë edhe një vajzë” (1990).
