Mbrëmjen e së shtunës është ndarë nga jeta prifti Nikolla Marku, në moshën 77-vjeçare, pas një sëmundjeje të rëndë që e kishte prekur prej kohësh.
Ai shërbeu për vite me radhë në Kishën “Shën Maria” në Elbasan, ku dhe do të zhvillohet ceremonia mortore këtë të diel, më 20 korrik, në orën 17:00. Familjarë, miq, besimtarë dhe qytetarë të Elbasanit pritet t’i japin lamtumirën e fundit.
Nikolla Marku njihej si një figurë e debatueshme brenda komunitetit ortodoks shqiptar. I vetëshpallur si përfaqësues i Kishës Ortodokse Autoqefale të Shqipërisë, ai nuk ishte i njohur nga strukturat zyrtare të Kishës dhe për vite me radhë kishte pasur përplasje publike me ish-kryepeshkopin Anastas Janullatos.
Në vitin 2020, Markut iu hoq emërtimi “At” dhe u përjashtua nga Kisha Ortodokse Autoqefale e Shqipërisë.
Në vitin 2013, ai i drejtoi një letër Patriarkanës së Stambollit, ku akuzonte Janullatosin për shkelje të vendimit “Tomas” të vitit 1936, një akt historik që njeh pavarësinë e Kishës Ortodokse Shqiptare. Marku këmbëngulte se drejtimi i kishës në Shqipëri duhej të bëhej nga një prift shqiptar, siç përcakton neni 34 i këtij vendimi.
Në letrën e tij, ai akuzonte hapur Janullatosin për “politikë antishqiptare” dhe e shihte atë si përfaqësues të interesave të huaja, që synonin ta shndërronin kishën shqiptare në një zgjatim të Kishës Ortodokse Greke.
Pavarësisht polemikave, Nikolla Marku mbeti një figurë e pranishme në jetën fetare të Elbasanit, i njohur për përkushtimin e tij ndaj komunitetit dhe për praninë e vazhdueshme në Kishën “Shën Maria”, ku edhe do të zhvillohet pritja për ngushëllime.
