Mjekësia shqiptare është në zi pas ndarjes nga jeta të Dr. Edi Tushes, pediatrit dhe neonatologut të njohur, i cili për dekada iu përkushtua kujdesit ndaj të porsalindurve dhe fëmijëve. Ai u nda nga jeta mbrëmjen e së hënës, 15 qershor, duke lënë pas dhimbje të madhe te familjarët, kolegët, pacientët dhe mijëra prindër që i kishin besuar fëmijët e tyre.
Dr. Tushe njihej si një prej figurave më të respektuara të mjekësisë shqiptare dhe një nga pionierët e shërbimit neonatologjik në vend. Me profesionalizmin, përvojën dhe humanizmin e tij, ai dha një kontribut të rëndësishëm në zhvillimin e neonatologjisë në Shqipëri, por edhe në formimin e brezave të rinj të mjekëve si pedagog dhe mentor.
Lajmi për ndarjen e tij nga jeta është bërë publik në faqen e klinikës që ai drejtonte, ku Dr. Tushe është kujtuar me fjalë të ndjera si një mjek i jashtëzakonshëm, një mik i shtrenjtë dhe një njeri që e bëri më të lehtë dhimbjen e shumë familjeve.
“Ka ikje që të lënë pa frymë. Ka humbje që nuk pranohen dot. Dhe ka njerëz që janë aq të mirë, aq të dashur, aq të pazëvendësueshëm, sa duket e padrejtë që Zoti t’i thërrasë kaq herët pranë vetes. Edi ishte njëri prej tyre.
Nuk po qaj vetëm një koleg. Nuk po qaj vetëm një mjek të shkëlqyer. Po qaj një mik të shtrenjtë, një njeri të rrallë, një shpirt të bukur që e bënte botën më të mirë vetëm me praninë e tij. Sa herë e shihja në klinikë, më dukej sikur gjithçka bëhej më e lehtë. Kishte atë qetësinë e njerëzve të mirë, atë buzëqeshjen e butë që të jepte siguri, atë mirësinë që nuk kishte nevojë të fliste me zë të lartë për t’u ndjerë. Sot tavolina e tij mbeti bosh. Stetoskopi heshti. Dera nuk do të hapet më për të pritur fëmijët që e donin aq shumë”, thuhet në njoftim.
Përtej figurës së tij si mjek i mijëra fëmijëve, Edi Tushe kishte ndarë me publikun edhe një plagë personale. Në vitin 2025, ai tregoi se nuk komunikonte me të birin prej 22 vitesh, një dhimbje që e kishte shoqëruar për një pjesë të gjatë të jetës së tij.
Kështu, ndarja e tij nga jeta merr edhe një peshë më të rëndë njerëzore. Dr. Tushe iku si një emër i dashur për mjekësinë shqiptare, por edhe si një baba që mbajti brenda vetes mungesën e të birit për më shumë se dy dekada.
Komuniteti mjekësor e cilëson humbjen e tij të madhe, ndërsa familjet që e njohën nga afër do ta kujtojnë si mjekun që u qëndroi pranë në momentet më delikate të jetës, kur fëmijët e tyre kishin më shumë nevojë për kujdes, siguri dhe besim. Ngushëllime familjes, të afërmve dhe kolegëve. U prehtë në paqe.
