Shaban Murati, diplomati dhe publicisti i njohur shqiptar, ka ndërruar jetë më 14 shkurt, në moshën 79-vjeçare.
Lajmin e ka bërë të ditur djali i tij, gazetari Erl Murati, përmes një postimi në rrjetet sociale.
“Faleminderit mjekëve dhe infermierëve të QSUNT, në veçanti Dr. Entela Bashës, të cilët u kujdesën për shëndetin e babait tim, Shaban Muratit, i cili u nda sot nga jeta. Ceremonia mortore mbahet nesër, në varrezat e Sharrës, duke nisur nga shtëpia në rrugën A. Z. Çajupi (pas shkollës Edit Durham) në orën 12:00. Familja pret ngushëllime të dielën, në hotel Mondial në oraret 10:00 – 14:00 dhe 16:00 – 19:00. Të mira e gëzime”, shkruan Erl Murati.
Shaban Murati, i lindur më 2 shtator 1945, ishte një figurë e shquar në diplomacinë dhe publicistikën shqiptare.
Ai shërbeu si ambasador i Shqipërisë në Maqedoninë e Veriut, Suedi, Norvegji, Finlandë dhe Islandë, dhe ka luajtur një rol të rëndësishëm në zhvillimin e politikës së jashtme të vendit.
Gjithashtu, ai ishte drejtues i Akademisë Diplomatike të Shqipërisë, duke kontribuar në formimin e brezave të rinj të diplomatëve shqiptarë.
Përveç karrierës së tij diplomatike, Murati ishte një autor dhe analist i njohur, duke botuar disa libra mbi çështjet e Ballkanit dhe marrëdhëniet ndërkombëtare.
Disa nga veprat e tij më të njohura janë:
• “Serbia kundër Serbisë: Analizë e një gjysmërevolucioni të lënë përgjysmë” (2004)
• “Enigmat diplomatike të pavarësisë së Kosovës:
Fletë nga ditari i një ambasadori” (2007)
• “Vetëvrasja diplomatike e Shqipërisë dhe Kosovës” (2021)
