Ditëve të fundit është folur shumë për një përballje të mundshme me Rusinë, mirëpo sekretari i Përgjithshëm i NATO-s, Jens Stoltenberg, ka folur rreth kësaj çështjeje në Bruksel, ku edhe është mbledhur me Ministrat e Mbrojtjes së aleancës.
Stoltenberg ka thënë se aleanca ushtarake është duke studiuar “mundësi të shumta” për t’u përballur me shkeljet e supozuara të Rusisë në marrëveshjen për kontrollin e armëve, mirëpo sipas tij aleatët perëndimorë dëshirojnë t’i ikin “garës së re të armëve”.
Mbledhja e këtij 13 shkurti ka qenë shumë e rëndësishme për faktin se mbledhja është thirrur për shkak të largimit nga Traktati për Forcat Bërthamore me Rreze të Mesme të Shteteve të Bashkuara dhe Rusisë.
“Kjo është shumë serioze. Ne do të shqyrtojmë situatën”, ka thënë Stoltenberg, duke shtuar se përgjigjja e NATO-s “do të jetë e matur dhe se do të ketë qëllim të mbrojtjes, për t’i ikur një gare armësh”.
Më 2 shkurt, Shtetet e Bashkuara kanë prezantuar procesin gjashtëmujor të largimit nga ky pakt, pasi Uashingtoni dhe NATO-ja vazhdimisht kanë akuzuar Moskën për shkelje të marrëveshjes, duke zhvilluar raketën, 9M729, të njohur edhe ai SSC-8.
Rusia në anën tjetër ka mohuar akuzat, dhe është tërhequr po ashtu nga ky pakt, i cili parasheh zhvillimin, prodhimin dhe pozicionimin e raketave tokë-ajër me rreze nga 500 deri në 5,000 kilometra.
