Naftëtarët e Ballshit kanë vijuar protestat tashmë prej disa muajsh në Ballsh dhe në Tiranë përpara ministrisë së Energjisë dhe Infrastrukturës, pasi kërkojnë 20 pagat e pamarra nga kompania private e cila menaxhon rafinerinë.
Edhe ditën e sotme naftëtarët e Ballshit, të mbështetur nga qytetarë, studentë, OJQ dhe minatorët e Bulqizës, kanë protestuar në Tiranë ku kanë parashtruar sërish kërkesat e tyre dhe kanë kërkuar një takim me përfaqësues të ministrisë së Energjitikës. Pas tentimit për çarjen e kordonit, naftëtarët janë përplasur ashpër me forcat e policisë të cilat ishin prezente për të garantuar sigurinë dhe mbarëvajtjen e protestës.
Gjatë protestës mësohet se ka patur disa incidente ku një protestuesi i ka rënë të fikët, ndërsa disa të tjerë janë shoqëruar nga policia në ambjentet e komisariatit.
Zëvendësministrja e Infrastrukturës dhe Energjitikës, ka kërkuar takim me përfaqësues të naftëtarëve, por këta të fundit e kanë refuzuaer pasi kërkojnë që të ballafaqohen vetëm me ministren Belinda Balluku.
“Duam takim vetëm me ministren. Na kanë sjellë në takim vetëm mashtrues. Do rrimë këtu nëse nuk japin zgjidhje”, kanë thënë naftëtarët.
Kujtojmë se naftëtarët kanë dalë në protestë për të disatën herë brenda këtyre ditëve, pasi kërkojnë mbi 20 rroga të pamarra.
