Myslim Murrizi ka hedhur akuza të forta për aferën “Bankers Petroleum”, duke e cilësuar si një nga skemat më të mëdha të korrupsionit në vend dhe duke përmendur emra konkretë politikanësh që sipas tij kanë përfituar miliona euro. Ai ka zbuluar se ish-ministri dhe ish-deputeti i PD-së, Eduard Halimi, përmes studios së tij ligjore, ka marrë 2.7 milionë euro nga shkurti 2019 deri në qershor 2025, me dy punonjës të punësuar. Nga kjo shumë, 720 mijë euro janë marrë vetëm katër ditë pasi PD dogji mandatet parlamentare.
Sipas Murrizit, PD nuk reagon për këtë aferë pasi vetë është e përfshirë. Ai thekson se prej vitit 2004, nafta shqiptare transportohet çdo ditë nga Ballshi në Vlorë pa paguar asnjë taksë fitimi, duke i shkaktuar shtetit një humbje prej rreth 15 miliardë eurosh.
Në listën e përfituesve, Murrizi përmend edhe ish-deputetin socialist dhe ish-drejtorin e pastrimit të parave, Alket Hyseni, që sipas tij ka marrë 6 milionë euro nga viti 2018 deri në 2025. Gjithashtu, studioja e avokatit Besnik Çerekja dhe bashkëshortes së tij, të cilët ai i akuzon si ndërmjetës ligjorë për pazare të paligjshme për të dyja partitë, ka përfituar 4.4 milionë euro nga viti 2020 deri në qershor 2025.
Murrizi kritikon ashpër deputetët e të dyja kampeve politike, duke thënë se në 21 vite askush nuk ka folur për këtë “super vjedhje”, ndërsa ata dalin në publik vetëm për të mbrojtur hotele dhe televizione të biznesmenëve si Irfan Hysenbelliu. Ai shton se drejtues dhe punonjës të huaj të “Bankers Petroleum” kanë përfituar paga shumë milionëshe, ndërsa akuzon edhe për sjellje degraduese ndaj punonjëseve femra.
Me tone të ashpra, Murrizi i pyet deputetët e PD-së nëse kanë guxim të flasin për “vjedhjen më të madhe të shekullit”, duke theksuar se deputetët e PS-së nuk reagojnë sepse janë të mbrojtur nga kryeministri Edi Rama, ndërsa ata të PD-së, sipas tij, janë të diskredituar nga vetë votuesit që prej vitit 2013.
