Pas “thagmës” më të fundit të lëshuar dje nga “mjeshtri i koronavirusit”, ministri i Turizmit, Blendi Klosi, rrjeti dhe mbarë opinioni publik ka shpërthyer në humor dhe tallje për deklaratat e tij.
Por vet ministri Klosi që duket se “i di mirë” ato që thotë, nuk lëkundet nga qëndrimet e tij, të cilat tashmë i ka kthyer edhe në slogane të punës për “zhvillimin” e sektorit të turizmit.
Ndërkohë, sot, moderatori dhe gazetari, Enkel Demi, ka ironizuar ministrin e Turizmit, Blendi Klosi, pas deklaratës së këtij të fundit në një intervistë televizive, ku u shpreh se, është vërtetuar shkencërisht se në zonat me muzikë, virusi përhapet më shpejt.
“Zonat me muzikë, dhe kjo është e vërtetuar dhe shkencërisht kudo në botë, janë zonat ku virusi përhapet më shumë nga çdo ambient tjetër, pasi valët e muzikës janë ato të cilët përçojnë, nëse në distancat ku ka valë muzike, përhapja e virusit është shumë e madhe”,- u shpreh Klosi.
Ndërkohë, gazetari tha me ironi se, Elton Deda, i cili ka qenë një ndër artistët që ka ngritur zërin pas vendimit të qeverisë për të ndaluar muzikën pas orës 20.00 dhe mbylljen e klubeve, “është një përçues i rrezikshëm i virusit”.
“Elton Deda është një përçues i rrezikshëm i virusit, dhe të gjitha llojet e muzikës. E mira është që të heshtim dhe të mos këndojmë dhe zilet e celularëve se do bëhen përçues.”,- tha ndër të tjera gazetari.
/GazetaReforma.com/
