Në Gjermani është regjistruar rasti i parë me variantin e ri të koronavirusit, i cili e ka origjinën nga Britania e Madhe.
E infektuar ka rezultuar një grua e cila kishte udhëtuar nga Londra drejt Gjermanisë, ndërsa këtë e ka konfirmuar edhe ministria e Shëndetësisë gjermane.
“Ky është rasti i parë i njohur në Gjermani”, tha në një deklaratë Ministria e Shëndetësisë e landit të Baden-Wuerttemberg.
Sipas mediave gjermane, gruaja kishte mbërritur në aeroportin e Frankfurtit më 20 dhjetor, ndërsa menjëherë sapo rezultoi pozitive gjatë testit në aeroport, u dërgua në vetizolim.
Pas këtij lajmi, institucionet dhe autoritetet shëndetësore janë vendosur në alarm dhe kanë filluar përgatitjet për masa më të rrepta karantinimi.
Kujtojmë se vetëm gjatë një dite në Gjermani janë shënuar 16643 raste të SARS-CoV-2.
Siç bën të ditur edhe Instituti Robert Koch (RKI), shifra e njerëzve që kanë humbur jetën nga virusi, është shtuar me 226 duke arritur në 26275.
I ashtuquajturi treguesi shtatëditor ka sipas RKI-së, vlerën 197,1. Kjo është vlera më e lartë që kur ka filluar pandemia në Gjermani. Numri i infektimeve të reja për 100 mijë banorë i arritur në shtatë ditë është një tregues tjetër që përdoret në luftën kundër koronavirusit. Synimi i deklaruar i qeverisë gjermane është që ta mbajë këtë tregues nën 50./Gazetareforma.com/
