Sëmundja ngjitëse e murtajës së ruminantëve të vegjël ka prekur një tjetër vatër në vendin tonë.
Zallbastari i Tiranës është përfshirë tashmë në hartën e zonave të infektuara, duke e çuar në pesë numrin e vatrave aktive.
Agjencia Kombëtare e Veterinarisë dhe Mbrojtjes së Bimëve ka njoftuar se deri më tani janë konfirmuar shtatë ferma pozitive, me një total prej 882 krerësh të prekur.
Kafshët po asgjësohen në përputhje me protokollet zyrtare, me qëllim ndalimin e përhapjes së sëmundjes.
Autoritetet kanë theksuar rëndësinë e bashkëpunimit nga ana e fermerëve, të cilëve u kërkohet të ndalojnë çdo lëvizje ose tregti të kafshëve dhe të respektojnë masat e biosigurisë në fermë.
Ky zhvillim vjen një ditë pas konfirmimit të vatër së parë në fshatin Shuec të bashkisë Devoll, qarku Korçë, ku sëmundja u identifikua në një fermë me dele dhe dhi që kishin shfaqur simptoma të qarta klinike.
Ekipet veterinare janë vendosur në terren për izolimin dhe dezinfektimin e zonës, ndërsa janë marrë mostra për analiza laboratorike.
Sipas të dhënave zyrtare, murtaja ka prekur gjithashtu katër zona të tjera: Shkodër, Dibër, Bulqizë dhe Skrapar. Deri më tani janë raportuar 716 kafshë të infektuara, nga të cilat 25 kanë ngordhur dhe 153 janë eliminuar në mënyrë të kontrolluar.
Sëmundja nuk përbën rrezik për shëndetin e njeriut, por konsiderohet veçanërisht e rrezikshme për tufat e deleve dhe dhive për shkak të vdekshmërisë së lartë dhe dëmeve ekonomike që shkakton.
Për të frenuar përhapjen, që prej 9 qershorit është në fuqi një urdhër ndalese për lëvizjen e dhenve dhe dhive midis fermave, përveç rasteve të transportit drejt thertoreve me dokumentacion veterinar të plotë.
Ndalohet gjithashtu çdo formë tregtimi në tregje të kafshëve të gjalla, panaire apo tubime publike.
Ministria e Bujqësisë ka aktivizuar 39 grupe kontrolli që kanë inspektuar deri më tani 983 ferma, duke mbuluar një total prej mbi 164 mijë krerësh dhen dhe dhi në të gjithë territorin.
Rastet janë raportuar edhe në Sistemin e Njoftimit të Menjëhershëm të Bashkimit Evropian për sëmundjet e kafshëve, ndërkohë që autoritetet shqiptare kanë kontaktuar Zyrën e Emergjencave të Komisionit Evropian.
Si reagim, dy ekspertë nga BE kanë mbërritur në Tiranë dhe po inspektojnë njërën prej vatrave të konfirmuara, ku pritet të japin udhëzime për menaxhimin e situatës.
Autoritetet u bëjnë thirrje të gjithë blegtorëve të qëndrojnë të kujdesshëm, të raportojnë çdo rast të dyshuar në numrin falas 08003366 dhe të zbatojnë me përpikëri masat për parandalimin e përhapjes së murtajës.
