Ditën e djeshme një qytetar denoncoi në rrjetet sociale, mungesën e Kosovës, në hartën e Europës, në librin “Qytetaria8”.
Ministrja e Arsimit Besa Shahini, ka reaguar duke thënë se është një gabim i paqëllimshëm.
Sipas saj, një zinxhir punonjësish nuk e kanë vënë re.
Ndër të tjera ajo shton, se Kosova është republikë dhe njihet nga SHBA dhe 22 vende anëtare.
“Kosova është Republikë dhe njihet si e tillë nga Shqipëria, Maqedonia e Veriut, Mali i Zi, 22 vende anëtare të BE-së, SHBA-të dhe shumë shtete të tjera aleate. Por nga autori i librit, te artisti grafik, te redaktori i shtëpisë botuese e deri te komisioni që ka dhënë OK për botim, nuk kanë qenë në gjendje ta vërejnë mungesën e shtetit të Kosovës në të!”, tha Shahini.
Më tej ajo thekson, se janë bërë përmirësime kolosale në tekstet shkollore, megjithatë pasaktësi të tilla nuk duhet të ekzistonin.
“Lajmi i mirë është se kjo ka ndodhur ndërkohë që po zhvillohet procesi i kontrollit të librave shkollorë, pasi sivjet është mbyllur procesi i hartimit të librave të reja. Pastaj do të vihet në lëvizje detyrimi për shtëpitë botuese që t’i adresojnë menjëherë me fletë plotësuese gabimet e konstatuara, ndërsa në vijim me redaktim të plotë”, shprehet Shahini.
