Është rikthyer përsëri moti i keq, erërat e forta dhe dëbora, ndaj edhe institucionet përkatëse iu bëjnë thirrje drejtuesve të mjeteve që të kenë kujdes në disa akse të vendit.
Vet Ministria e Mbrojtjes ka deklaruar se disa zona janë shumë të vështira për t’u kaluar, pasi trashësia e borës ka arritur në 1 metër, madje disa fshatra kanë mbetur pa energji elektrike dhe komplet të izoluar.
Ndërkohë Autoriteti Rrugor bën me dije se të gjithë ata drejtues mjeti që udhëtojnë për në veri të vendit duhet që të përdorin patjetër zinxhirët.
Gjendja deri më tani paraqitet kështu:
Njësia administrative Arrën në bashkinë Kukës raportohet të jetë e bllokuar ndërsa janë angazhuar 2 fadroma dhe 6 punonjës.
Në Tropojë janë bllokuar fshatrat e njësisë administrative Lekbibaj. Aksi rrugor Prekal-Shosh-Shalë-Theth është i hapur, por kalimi i mjeteve kryhet me vështirësi.
Në Qarkun Korçë, gjatë orëve të natës ka pasur reshje bore. Kontraktorët kanë vazhduar punën për pastrimin dhe zgjerimin e akseve dhe shpërndarjen e kripës ndërsa me zinxhir qarkullohet në rrugën Boboshticë- Dardhë dhe Qafë Qarri-Ersekë.
Në Rajonin Verior Shkodër Gjatë natës ka pasur reshje bore shoqëruar me erë të fortë. Qarkullohet me zinxhir, ose pjesërisht me zinxhir ne rrugët:Zalldardhë-Reç-Draj Reç, Kryqëzim Domaj-Draj Reç
Ura e Cerenecit-Steblevë, 20 km e fundit të aksit. Kuben-Vasie, Trebisht-Doganë dhe Qafë Bualli-Krastë. Autoriteti Rrugor Shqiptar rekomandon përdoruesit e rrugës, të bëjnë kujdes në lëvizje, të respektojnë sinjalistikën dhe udhëzimet e Policisë Rrugore.
