Prej disa javësh tensioni mes Kosovës dhe Serbisë duket se është aktivizuar sërish, sidomos lidhur me daljen nga qarkullimi i dinarit serb, vendim i marrë nga Banka Qendrore e Kosovës.
Ditën e sotme, kryeministri i Kosovës, Albin Kurti ka deklaruar se me vendet aleate, përfshirë SHBA-të, vendi i tij ka një marrëdhënie miqësore, por kjo nuk do të thotë bien dakord në gjithçka. Ky reagim i tij vjen në kuadër të deklaratave të mbajtura nga disa zyrtarë të lartë të SHBA-ve.
“Ne me vendet aleate e partnere jemi miq, por që nuk do të thotë se pajtohemi në çdo vend dhe për gjithçka”, deklaroi Kurti.
Kurti tha se Qeveria e Kosovës, në bazë të ligjeve dhe të Kushtetutës, ka për detyrë ta mbështesë vendimet dhe rregulloret e BQK-së.
Kryeministri i Kosovës është deklaruar edhe në lidhje me mundësinë e një takimi mes tij dhe presidentit të Serbisë Aleksandër Vuçiç.
“Jam treguar konstruktiv. Edhe atëherë kur na kanë thirrur në Bruksel, raundi i bisedimeve nuk mund të thuhet se ka qenë i suksesshëm. Unë këtë e bëj për BE-në, por edhe për shkak se duhet të kemi marrëdhënie normale me Serbinë”, tha ai.
