“Mosbindja civile” bllokon sot Tiranën

Mbështetësit e opozitës pritet të zhvillojnë pasditen e sotme një tjetër akt të ashtuquajturës “mosbindje civile” në rrugët e Tiranës.

Nën moton “O sot, o kurrë”, protesta do të përfshijë bllokimin e 5 kryqëzimeve kryesore të kryeqytetit për të paktën tre orë, si një formë presioni për lirimin e liderëve të arrestuar dhe për kërkesën për një qeveri teknike që do të organizojë zgjedhjet e ardhshme parlamentare.

Protesta është planifikuar të nisë në orën 17:00 dhe të përfundojë në orën 20:00.

Ashtu si herën e fundit, kur u bllokuan disa akse kryesore, nuk do të ketë fjalime apo podium për drejtuesit e opozitës.

Në vend të kësaj, organizatorët do të shpërndahen me mbështetësit në pika të rëndësishme, si Bashkia e Tiranës, Rrethrrotullimi i “Zogut të Zi”, “Rruga e Elbasanit”, “Sheshi Wilson” dhe “Pallati me Shigjeta”.

Opozita ka intensifikuar protestat e saj në muajt e fundit, si në rrugë ashtu edhe në Kuvend, duke kundërshtuar kryeministrin Edi Rama dhe qeverinë e tij.

Një nga kërkesat kryesore mbetet formimi i një qeverie teknike për të garantuar zgjedhje të lira dhe të ndershme në pranverën e ardhshme.