Kryeministri Edi Rama, gjatë mbledhjes së sotme, lexoi një mesazh të një qytetari, emri i të cilit nuk u bë i ditur. Mesazhi ngrinte dyshime mbi gjyqtarin që po trajton çështjen e kryebashkiakut Erion Veliaj, duke e cilësuar atë si të përfshirë në të gjitha rastet që lidhen me eksponentë të Partisë Socialiste.
Sipas Ramës, disa gjyqtarë të tjerë nuk kishin pranuar të merrnin çështjen, ndërsa ai që e mori kishte prirje për të lehtësuar masat e sigurisë, jo për t’i ashpërsuar.
Ai vijoi akuzat ndaj sistemit të drejtësisë, duke e cilësuar gjyqtarin si “ekstremist të djathtë” dhe “kamikaz të PD-së në GJKKO”.
Rama përmendi gjithashtu përfshirjen e të njëjtit gjyqtar në çështjen “Toyota Yaris”, duke ngritur pikëpyetje mbi publikimin e materialeve të kësaj dosjeje.
“Tani dosjen e ka bufi i kënetës që e lexon në parlament. Është e ndaluar të përhapet e të publikohet. Kjo është vepër penale. Mos bëjnë gabim të kërkojnë telefonin tim, se kanë boll telefonat e gjithë Shqipërisë,” u shpreh Rama.
Ai gjithashtu kërkoi që Dumani të gjurmojë rrjedhjen e informacioneve dhe të sqarojë publikun mbi këtë çështje.
