Presidenti i vendit Ilir Meta ishte i ftuar mbrëmjen e sotme në emisionin “Opinion” ku foli për gjendjen politike në vend, por jo vetëm ai iu përgjigj edhe akuzave të kryeministrit Rama.
Gjatë intervistës , presidenti Meta akuzoi kryeministrin Edi Rama se mori porosi për të hedhur në gjyq ish-kryeministrin e Kosovës, Ramush Haradinaj. Më tej, Meta tha se Rama u tërhoq disa muaj pas padisë, për të provuar se kishte propozuar ndarjen e Kosovës.
“Dy gjëra të them; E para si mundet në 10 vjetorin e pavarësisë së Kosovës, kryeministri i Shqipërisë thotë se pas disa vjetësh do të kemi një president të përbashkët. Pala tjetër thotë se këta kanë plane. Nuk është rastësi kjo. Kjo do të thotë që Kosova nuk do të jetë shtet, nuk duhet të njihet sepse një ditë do të aneksohet me Shqipërinë.
Çfarë do të thotë që kryeministri i Shqipërisë e hedh në gjyq kryeministrin e Kosovës. Pse e bën? Për të krijuar idenë se këta shqiptarë… E hedh në gjyq sepse merr porosi për të defaktorizuar Kosovën në procesin e negociatave. Pse u tërhoq nga gjyqi pas disa muajsh, sepse ai tjetri do t’i provonte ai tjetri se kishte propozuar ndarjen e Kosovës”, tha Meta
Gjithashtu, presidenti Ilir Meta iu përgjigj edhe akuzave të kryeministrit Edi Rama, i cili thoshte se Meta takohet me trafikantët që janë subjekte të OFL-së.
Presidenti u shpreh në emisionin “Opinion” se nuk mund të takohet me asnjë person pa qenë nën mbikëqyrjen e Gardës së Republikës, ndërsa iu kundërpërgjigj kreut të qeverisë duke shtuar se ai është i vetmi person me rekorde kriminale që ka takuar.
“Shpifjet e kryeministrit tonë të dashur nuk kam kohë t’i takoj. Unë të vetmin person që kam takuar me rekorde kriminale është Edi Rama. Lëri ato përrallat e atij çfarë di ai. Unë ruhem nga garda e Republikës. Unë jam te shtëpia, te pallati i Brigadave, të rezidenca në Durrës dhe shtëpia ku jetoj në Lalëz. Unë nuk mund të shkoj askund. Ai gënjen edhe pa hapur gojën jo më kur hap gojën. Ai ka bërë një krim të jashtëzakonshëm sepse ka frikë nga vota e shqiptarëve. Me lista të hapura i del nga kontrolli Partia Socialiste. Ai është mister 1 prilli”, shprehet Meta.
