Politikanët në Argjentinë kanë votuar disa javë më parë pro një projektligji që çon shtetin me shumicë katolike drejt legalizimit të abortit, ndryshim ky i kërkuar për kohë të gjatë nga aktivistet për të drejtat e grave.
Dhoma e Ulët e Parlamentit votoi disa javë më parë pro ligjit të propozuar më 131 vota për, kundrejt 117 kundërshtimeve. Përpara se të kthehet në ligj, ky dokument duhet të miratohet edhe në Dhomën e Lartë të parlamentit.
Ndërkohë votimi përfundimtar u bë sot në Kongres, ku u legalizua aborti deri në javën e 14-të të shtatzënisë.
Senatorët votuan në favor të projektligjit, pas një seance maratonë, me 38 vota pro, 29 kundër dhe një abstenim.
Kujtojmë se Argjentina ka pasur ndër ligjet më të ashpra sa i përket abordit, ku lejohej vetëm në raste përdhunimi ose kur shëndeti i nënës ishte në rrezik. Shumë gra në Argjentinë që kryejnë abort, rrezikojnë të përballen me ndëshkim me ligjin ekzistent.
Kisha Katolike ka bërë thirrje të vazhdueshme që mos e miratojnë këtë ligj, por ta refuzojnë.
“Unë jam katolik, por unë duhet të bëj ligje për të gjithë. Kjo është çështje shumë serioze për shëndetin publik”, ka deklaruar presidenti i Argjentinës, Alberto Fernandez, i cili e ka mbështetur masën.
Kisha Katolike ka përsëritur kundërshtimet për abortin, duke iu kërkuar politikanëve në Argjentinë për “reflektim të dytë rreth asaj se çfarë do të thotë respekti për jetën”.
Amerika Latine për shkak edhe të kulturës katolike, ka disa prej ligjeve më të ashpra në botë në lidhje me abortin dhe vota në Argjentinë do të shihet me shumë vëmendje, në këtë çështje polarizuese në rajon./Gazetareforma.com/
