Mjeku kardiolog Edvin Prifti, ka kërkuar të kthehej në detyrë, por Gjykata e Apelit të krimit të organizuar e ka lënë të pezulluar nga detyra.
Kardiologu, Prifti do të vijojë të mbetet i pezulluar nga detyra. Ai kërkoi kthimin në sallën e operacionit për të vijuar me aktivitetin, por i është rrëzuar kërkesa nga Gjykata e apelit të krimit të organizuar.
Prifti ndodhet nën hetim nga SPAK për korrupsion dhe pastrim parash. Fillimisht ai u ndalua pasi i doli emri në disa përgjime me sekretaren e gjykatës së Krujës për marrje ryshfeti në këmbim të operimit të nënës. Më pas ai akuzohet se ka abuzuar dhe me disa tendera në QSUT.
Madje atij i janë sekuestruar edhe pasuri në shuma monetare prej 250 mijë eurosh dhe 160 milion lekësh.
Kujtojmë që disa kohë më parë kardiologu Edvin Prifti, është pezulluar nga detyra, së bashku me infermieren e QSUT-së: Rasti tjetër që u zbulua nga hetimet e SPAK-ut për funksionarët e Krujës.
Sipas njoftimit të SPAK-ut është pezulluar nga detyra mjeku kardiolog i QSUT-së Edvin Prifti si edhe infermierja e QSUT-së Trendafile Frangu.
Emrat e tyre dolën pas hetimeve të SPAK për rastin e lirimit të një të dënuari me 25 vite burg në Fushë-Krujë, ngjarje për të cilën u arrestuan 10 persona mes të cilëve edhe gjyqtarja Enkeleda Hoxha si dhe një mjek, Shëlqim Korbi.
