Para dy javësh mjeku popullor Hysri Peqani, i njohur si Burdushi, ka tentuar t’i japë fund jetës në qendrën e paraburgimit në Prizren, nga ku po mbahet për më shumë se dy muaj.
Drejtori i Shërbimit Korrektues të Kosovës, Nehat Thaçi, ka thënë se Burdushi ka tentuar të bëjë vetëvrasje më 25 shkurt të këtij viti, rreth orës 05:00 të mëngjesit, por zyrtarët korrektues kanë reaguar shpejt dhe kanë parandaluar një tentativë të tillë.
Por pse e ka bërë Burdushi një veprim të tillë? Ai ka deklaruar se e ka bërë në shenjë të pakënaqësisë ndaj vendimit të Gjykatës.
“Me datën 25.02.2019, rreth orës 05:00 të mëngjesit, i paraburgosuri H.P. ka tentuar të bëjë vetëvrasje, me ç’rast si mjet ka përdorur çarçafin e shtratit, i cili është në dhomën e tij. Pasi është dëgjuar një zhurmë në dhomë, zyrtarët korrektues kanë reaguar shpejt dhe kanë parandaluar një tentativë të tillë ende pa filluar (d.m.th. në fazën fillestare)”, ka thënë Thaçi për gazetën “Express”.
Drejtori i burgjeve ka thënë se Burdushit i është dhënë ndihma mjekësore dhe se është konstatuar që nuk ka lëndime.
“Të paraburgosurit në fjalë i është dhënë ndihma mjekësore dhe është bërë kontrolli mjekësor, me ç’rast është konstatuar se nuk ka kurrfarë lëndime, por përveç shqetësimit dhe frustrimit. Në bazë të deklaratës së dhënë nga i paraburgosuri, këtë veprim e ka bërë në shenjë të pakënaqësisë së vendimit të Gjykatës dhe të padrejtësisë që i është bërë atij”, ka thënë Thaçi.
