Një 33-vjeçare në Durrës, ka humbur jetën në mënyrë të mistershme.
Romina Xhakoni Myftiu, punonte si arkëtarë në Ndërmarrjen e Ujësjellësit të Qytetit.
Familjarët e saj thanë për “News24”, se e kishin dërguar në spital më 8 janar pas një gjendjeje gripale.
Pasi luftoi për 36 orë me vdekjen , e reja nuk mundi dot t’ja dilte.
Në 12 orët e fundit, organet e saj nuk funksiononin më, si pasojë e temperaturës së lartë.
Spitali i Durrësit bën me dije se janë marë mostrat e gjakut dhe janë dërguar në Institutin e Shëndetit Publik në Tiranë.
Për familjarët e saj mbetet ende mister shkaku i vdekjes së të afërmes së tyre.
Alban Myftiu, vëllai i viktimës, tregon se më 7 janar motra nuk ishte ndjerë mirë, pasi kishte temperaturë të lartë.
Menjëherë familjarët e çuan në urgjencën e spitalit për të marrë ndihmën e parë.
Mjeku u kishte thënë familjarëve se e reja ka paralizë raciale dhe më pas i kishte nisur në shtëpi, duke u thënë që nesër të paraqiten te mjekja specialiste.
Të nesërmen familjarët e dërguan në spital në gjendje edhe më të rëndë.
Ajo u shtrua menjëherë në urgjencë dhe me kalimin e orëve ajo vdiq, pasi veshkat i kishin dalë jashtë funksionit.
