Qendra Shëndetësore në Spitalin e Sarandës është mbyllur ditën e sotme për shkak të përhapjes së koronavirusit.
Mësohet se pozitive ka rezultuar mjekja pediatre e kësaj qendre.Për rrjedhojë është bërë karantinimi i familjes së mjekes njëherësh edhe i infermiereve të kësaj qendre dhe dezinfektimi i ambienteve. Ndërkohë që ka nisur hetimi epidemiologjik i rasteve të kontaktit të mjekes.
Ministria e Shëndetësisë dhe Mbrojtjes Sociale ka njoftuar ditën e sotme se në gjithë vendin janë kryer 914 testime nga të cilat kanë rezultuar pozitivë 162 qytetarë të prekur nga virusi SARS-COV2.
Gjithashtu janë shëruar 150 qytetarë, duke e çuar në 9115 numrin e të shëruarve në vend që prej fillimit të epidemisë.
Në 24 orët e fundit, me gjithë përpjekjet e mjekëve, fatkeqësisht e kanë humbur betejën me COVID19, një 47 vjeçar nga Tirana, një 68 vjeçare nga Kavaja, një 72 vjeçar nga Shkodra, një 75 vjeçar nga Korça.
