Përfaqësues dhe mjekë të repartit të epidemiologjisë në qytetin e Durrësit kanë protestuar ditën e sotme pasi nuk kanë marrë shpërblimin e premtuar të qeverisë për mjekët e vijës së parë në përballjen me Covid-19.
Kryetari i Konfederatës së mjekëve në qytetin e Durrësit, Zija Alhysa deklaroi se urdhrat e ministres së Shëndetësisë dhe të qeverisë nuk zbatohen për më tepër nga ana e drejtuesve të drejtorisë së Spitalit të Durrësit ka përgjigje me arrogancë dhe nuk ka transparencë.
Ai u shpreh se kanë lajmëruar për protestë, por personeli ka frikë dhe presion se i pushojnë nga puna, teksa shton se ka lënë afat për 3 ditë që të marrin përgjigje dhe më pas do ndërpresin punën.
“Kemi urdhrin e ministres dhe të qeverisë të cilat nuk zbatohen fare. Deri tani asnjë person nuk ka marrë asnjë shpërblim të premtuar. Kemi bërë nga 60 orë në javë dhe asgjë s’kemi marrë. Ky është muaji i tretë që punojmë në këtë situatë, dhe kanë marrë vetëm miqtë e drejtoreshës. Ne kishim lajmëruar për protestë por personeli ka frikë dhe kanë presion se i pushojnë nga puna. Edhe shefi i epidemiologjisë nuk ka dalë këtu se i bëjnë presion. Ne kemi lënë afat për 3 ditë që të na japin përgjigje dhe më pas do ndërpresim punën, nuk kemi ku shkojmë tjetër”, tha Alhysa.
Sipas tij, qeveria e ka alokuar fondin por po keqmenaxhohet nga institucionet, duke akuzuar drejtoreshën e spitalit Aurora Hyka për arrogancë dhe mospërfillje.
“Kemi kërkuar transparencë dhe na janë përgjigjur me arrogancë dhe mospërfillje. Unë e di detyrën time, kur ka situatë epidemie dhe vatra infeksioni duhet të jemi në krye edhe pa qenë drejtoresha fare por drejtoresha e ka ç’organizuar punën” deklaroi ai.
Ata kërkojnë që qeveria të mbajë premtimin për shpërblimin por edhe pagesën për punën e kryer të shtunave dhe të dielave, ditë për të cilat kanë punuar gjatë 3 muajve të fundit.
