Ngjarja e ndodhur disa javë më parë në një hotel në Qerret të Kavajës ku u gjetën të pajetë trupat e 4 turistëve rusë, mes të cilëve edhe një gjeneral, vijon të mbetet me mister.
Nga raportimet mësohet se grupi hetimor ka kërkuar ndihmën e një kompanie të huaj edhe për të bërë analizat e ujit të pishinës së brendshme, e cila ishte përdorur nga turistët.
Po kështu mësohet se Prokuroria e Kavajës, ende nuk ka marrë të dhëna nga telefonat celularë, që ju gjetën katër turistëve. Burime nga grupi hetimor bëjnë me dije se aparatët celularë që përdornin turistët janë e llojit iphone.
Ekspertët nuk kanë mundur dot të hapin telefonat për të përfituar të dhëna që do ti ndihmonin hetuesit, se me cilët persona turistët kanë komunikuar apo kanë folur përpara tragjedisë. Ato kanë kërkuar ndihmën e izralitëve ku pajisjet pritet që të dërgohen në izrael për ti hapur ato.
Sipas grupit hetimor kjo kërkesë është bërë pasi sipas tyre zbardhja e bisedave apo telefonata që ata kanë kryer mund ta ndihmojë grupin hetimor për zbardhjen e ngjarjes. Ndërkohë një enigmë tjetër e hetuesve se turistëve i janë gjetur vetëm dy telefona, megjithëse ata ishin katër persona.
Nuk dihet se cilëve nga familjarëve rusë i përkisnin telefonat dhe nuk dihet se cili nga viktimat kanë qenë pa telefon.
Edhe pse hetuesit kanë kontrolluar për gjetjen e telefonave të tjerë, nuk kanë mundur të gjendet as në pishinën ku u gjenden viktimat dhe as në dhomat që ata kishin rezervuar në hotel.
Moska zyrtare prej disa ditësh pret marrjen e të dhënave të detajuara lidhur me ngjarjen. Mediat kanë raportuar se përfaqësues të Ambasadës ruse në Tiranë ishin javën e kaluar në ambientet e Institutit të Mjekësisë Ligjore, për të marrë të dhëna mbi vdekjen e mistershme të katër turistëve rusë.
Nga të dhënat e para të Mjekësisë Ligjore dyshohet se shkak për vdekjen e turistëve është bërë asfiksia, ndonëse nuk dihet ende se nga se ka ardhur ajo.
Çifti Natalia Burenkova, 58 vjeçe dhe Sergei Burenkov, 60 vjeç, dhëndri i tyre, Nikita Belousov, 37 vjeç, dhe vajza e tyre, Ekaterina Burenkova, 31 vjeçe, u gjetën të pajetë, ndërsa Prokuroria e ka regjistruar ngjarjen si vrasje e mundshme, por pa pasur një autor.
Në dëshminë e tij, recepsionisti ka thënë para hetuesve se ka qenë ora rreth 22:30 kur ai ka shkuar në zonën e saunës, ku ishin 2 çiftet, ndërsa i ka thirrur disa herë për t’i njoftuar se pijet dhe frutat iu kishin shkuar në dhomë.
“Iu thirra disa herë se pijet dhe frutat ishin gati. Pasi nuk m’u përgjigj njeri, hyra brenda në sauna dhe i pashë të katër, nuk m’u përgjigjën. Njëri ishte i shtrirë në shezlong, dy në stol dhe një tjetër ulur me këmbët në pishinë. Ishin të asfiksuar”, mësohet të jetë shprehur punonjësi i hotelit.
