Në raundin e dytë të Grupit C të Euro 2024, Sllovenia dhe Serbia u përballën në Allianz Arena të Mynihut, duke ndarë pikët pas një ndeshjeje dramatike që përfundoi 1-1. Ndeshja u karakterizua nga lufta e fortë dhe momente emocionuese, me të dyja skuadrat që kishin shanset e tyre për të siguruar fitoren.
Pjesa e parë përfundoi pa gola, me rezultatin 0-0, pavarësisht përpjekjeve të shumta nga të dyja ekipet. Sllovenët dominuan në kontrollin e topit dhe arritën të godasin shtyllën, duke qenë shumë afër avantazhit. Nga ana tjetër, serbët patën mundësinë më të mirë në fund të pjesës së parë kur sulmuesi Aleksandar Mitroviç, i vetëm përballë portierit Jan Oblak, nuk arriti të shënojë.
Në pjesën e dytë, kombëtarja sllovene u tregua më pragmatiste, duke arritur të shënojë golin e avantazhit në minutën e 69-të me një goditje të saktë nga David Karnicnik. Pas këtij goli, serbët intensifikuan përpjekjet e tyre për të barazuar rezultatin. Përpjekjet e tyre u shpërblyen në minutat shtesë, kur sulmuesi Luka Joviç devijoi saktë me kokë një krosim nga këndi, duke i dhënë Serbisë pikën e parë në këtë Evropian.
Me këtë barazim, Sllovenia shkon momentalisht në vendin e dytë me 2 pikë, ndërsa Serbia barazon Danimarkën me 1 pikë. Ndeshja e ardhshme do të jetë vendimtare për të dyja skuadrat në përpjekjet e tyre për të kaluar në fazën tjetër të turneut.
