Deputeti demokrat i Lushnjës, Saimir Korreshi ka komentuar sërish deklaratat e tij të bujshme se në spitalin e Lushnjës ka minj. Në emisionin “Frontline” në Neës 24, Korreshi ka thënë se kjo gjë është e vërtetë, ndërsa i ka bërë ftesë edhe ministres ta vizitojë spitalin.
Deputeti ka treguar gjithashtu se një nga ambulancat e spitalit të Lushnjës e ka motorin të djegur dhe ende nuk është rregulluar, dy të tjera nuk janë në gjendje për punë, ndërsa 3 që kanë ngelur nuk i kanë kushtet.
“Kafshët, minjtë janë realisht në spitalin e Lushnjës. I kam bërë ftesë ministres të vijë të vizitojë spitalin e Lushnjës. Të shtruarit në Lushnje shtrohen ditën dhe në darkë ikin në shtëpi. Doktorët ankohen se gjatë operacioneve nuk ka kushte, kondicionerë. Sot po të verifikosh ambulancat e Lushnjës njëra ka djegur motorin dhe akoma nuk është rregulluar 2 të tjera janë për skrap dhe 3 që kanë ngelur janë hapa dollapa mjerë ai që shtrohet mbrapa. Spitali i Lushnjës është katastrofë. Sot tek pediatria nuk ka drita. Kjo nuk është normale”- tha deputeti.
Korreshi është ndalur gjithashtu edhe tek e qeshura e kreut të PD, Lulzim Basha, gjatë fjalimit të tij dhe ka thënë se ai dhe deputetët e tjerë qeshën me batutat e tij.
