Ministrja e Arsimit dhe Sportit Evis Kushi, ka reaguar mbrëmjen e sotme me një postim në rrjetin e saj social në “Facebook” ku ka ndarë një video mesazh në lidhje me zhvillimin e mësimit.
Ajo ka thënë se duke filluar nga dita e hënë e javës së ardhshme, në të gjitha shkollat e vendit, do të zhvillohet mësim normal, pa turne dhe me kohëzgjatje normale të orëve mësimore.
Ministrja bëri të ditur se vendimi është marrë pas konsultimeve me Ministrinë e Shëndetësisë dhe Komiteti Teknik të Ekspertëve. Po ashtu, vendimi është marrë duke pasur parasysh edhe ecurinë e procesit të vaksinimit të mësuesve.
Kujtojmë se mësimi me turne dhe orët e reduktuara sollën së fundmi një reagim të prindërve të cilët kërkuan kthimin e normalitetit në shkolla. Prindërit ngritën shqetësimin për mangësitë në formimin e fëmijëve pas tre vitesh mësim të cunguar për shkak të tërmetit dhe pandemisë.
Këtij problemi i shtohet dhe pamundësia e dërgimit të shumë prindërve për dërguar dhe për t’i marrë të vegjlit nga shkolla. Ata shpërndanë një peticion nëpër shkollat e Tiranës që pritej t’i dorëzohej ministrisë së Arsimit të hënën.
Në mungesë të një zgjidhje prindërit paralajmëruan përshkallëzim të veprimeve të tyre.
Postimi i ministres Kushi:
Nisur nga vendimet tuaja të drejta dhe nga përgjegjësia jonë për të garantuar cilësinë në sistemin arsimor, gjatë gjithë kësaj periudhe kemi qenë në komunikim të vazhdueshëm me Ministrinë e Shëndetësisë, Komitetitn e Ekspertëve, dhe Institutin e Shëndetit Publik. Për të rivlerësuar edhe njëherë së bashku të gjitha protokollet anti-Covid që duhet të zbatohen aktualisht në shkolla, e në mënyrë të veçantë ,me ruajtjen e distancës së nxënësve çka na ka detyruar të aplikojmë mësimin me turne në disa shkolla në qytetet më të mëdha të vendit. U jam mirënjohëse ekspretëve të cilët duke marrë parasysh ecurinë mjaft të mirë të procesit të vaksinimit të mësuesve, tashmë mbi 88% të vaksinuar, n’a dhanë mundësinë të kthejmë mësimin nirmal në të gjitha shkollat tona duke filluar që nga dita e hënë e javës së ardhshme, pa turne dhe me kohëzgjatje normale.
