Ministrja e Arsimit, Rinisë dhe Sporteve, Besa Shahini, pas kërkesave të studentëve për shfuqëzimin e ligjit për Arsimin e Lartë, foli për katër ndryshimet që do të bëhen në këtë të fundit.
Ministrja tha se ndryshimet nisin që nga përfaqësimi i studentëve, rritja e peshës së votës nga 10-50 për qind si dhe përfaqësim në senat dhe në borde.
Sipas saj, me këto ndryshime, studentët do të kenë mundësi të zgjedhin përmes votës se kush duhet t’i përfaqësojë ato.
“Ka të bëjë me një nismë ligjore për ndryshimin e katër neneve të ndryshimit të Ligjit të Arsimit të Lartë. Rritja e përfaqësisë së studentëve nga 10-50 për qind, por edhe në organet e tjera të zgjedhjeve të dekanëve, por edhe në borde të tjera të menaxhimit. Për vendimet në senat duhet një ekspertizë shumë e lartë.
Ne për hir të transparencës dhe llogaridhënies kemi marrë një vendim që do të shkarkojmë të gjithë drejtuesit e bordeve, ndërsa kemi bërë thirrje publike për përfaqësues të rinj.
Kemi themeluar portalin e transparencës, ku do të botohen të gjitha vendimet dhe buxheti. Ky informacion do të azhurnohet çdo tre apo katër muaj dhe kjo rrit transparencën”-tha mes tjerash ministrja Shahini.
