Takimi i përcaktuar për t’u zhvilluar ditën e sotme mes studentëve të Universitetit të Shkodrës dhe Ministres së Arsimit, Besa Shahini nuk ka pasur një fund të mirë.
Ministrja ka braktisur takimin që do zhvillohej me Senatin e Universitetit të Shkodrës “Luigj Gurakuqi”, pasi studentët kanë kërkuar që takimi të zhvillohej në praninë e medias.
Takimi po mbahej në bibliotekën e universitetit, ndërkohë që ministrja ka lënë takimin dhe ka preferuar që të largohet dhe këtë veprim studentët e kanë quajtur të turpshëm.
Mirëpo për këtë rast na vjen edhe një deklaratë nga vetë ministrja, ku nëpërmjet një posti në rrjetin social Tvvitter, ajo ka thënë se kanë qenë studentët ata që kanë kërkuar takim pa kamera.
“Keqardhje ndaj dhjetra studentëve të Universitetit të Shkodrës që më kishin kërkuar takim për të diskutuar për #paktinpëruniversitetin me kushtin që takimi të bëhej pa media, e që nuk erdhën sepse salla ishte mbushur me kamera. Jam në dispozicion për takim tjetër kurdoherë”, shkruan Besa Shahini.
