Ditën e sotme Ministria e Shëndetësisë njoftoi se gjatë 24 orëve të fundit nga 835 testime të kryera janë identifikuar 116 raste pozitive me Covid-19.
Ndërkohë në dy spitalet Covid kanë humbur jetën 5 pacientë nga Tirana, një 56 vjeçar ; një 64 vjeçare, një 71 vjeçare ; një 77 vjeçar dhe një 89 vjeçare.
Gjithashtu Ministria njoftoi se në spitalin Infektiv dhe “Shefqet Ndroqi” po trajtohen 189 pacientë të konfirmuar pozitivë me COVID-19, 20 në terapi intensive nga të cilët 8 pacientë janë të intubuar.
Ministria u bëri një thirrje të vecantë të rinjve që të tregojnë kujdes, pasi ky virus nuk njeh moshë i prek të gjithë dhe madje për disa është edhe fatal.
Për këtë arsye respektimi i masave dhe protokolleve të vendosura nga Ministria është vendimtar në luftën me këtë virus dhe ndalimin e përhapjes së tij.
Njoftimi i MSH
Ministria e Shëndetësisë dhe Mbrojtjes Sociale u drejtohet me një thirrje secilit prej jush: Tregoni kujdes me respektimin e rregullave. Përdoreni maskën kudo në ambientet e mbyllura, kur hyni në supermarket, në dyqane, në zyrë dhe në çdo ambient publik ku nuk mund të ruani distancën.
Një thirrje vecanërisht për të rinjtë, të tregojnë kujdes sepse virusi nuk njeh moshë dhe nuk bën përzgjedhje. Bashkëpunimi juaj është vendimtar për ta fituar luftën me virusin e rrezikshëm dhe për të frenuar përhapjen e tij.
Kur dyshoni se jeni të prekur duhet të qëndroni të izoluar dhe telefononi në numrin e Urgjencës Kombëtare, 127.
Telefononi në linjën e gjelbër falas 0800 40 40 për të kontaktuar mjekun e familjes apo për çdo informacion tjetër rreth Covid19
