Mbrëmjen e sotme është shënuar viktima e 24-t nga koronavirusi në Shqipëri dhe lajmi është bërë i ditur nga Ministria e Shëndetësisë.
Në një njoftim zyrtar Ministria bën me dije se viktima është një 68-vjeçare nga Tirana, me inicialet L.K., e cila prej 10 ditësh po trajtohej në spitalin Infektiv, ku edhe ndodhej e intubuar.
68-vjeçarja e prekur nga COVID-19 vuante edhe nga insufencenca renale dhe për 10 ditë që kishte qëndruar në spitalin Infektiv kishte kryer pesë seanca dialize.
NJOFTIMI I MINISTRISË:
Ka ndërruar jetë sot në spitalin infektiv një paciente 68-vjeçare nga Tirana, me inicialet L.K., e cila trajtohej prej 10 ditësh në shërbimin Infektiv në gjendje të rëndë, e intubuar.
68-vjeçarja e prekur nga COVID19 vuante nga insufencenca renale dhe kishte kryer pesë seanca dialize brenda spitalit infektiv gjatë këtyre ditëve. Pavarësisht përpjekjeve maksimale të stafit mjekësor, 68-vjeçarja nuk ja doli të mbijetojë. Ministria e Shëndetësisë dhe Mbrojtjes Sociale i shpreh ngushëllimet familjes së të ndjerës dhe u kërkon qytetarëve të vijojnë të respektojnë me shumë rigorozitet masat e distancimit fizik, si e vetmja mënyrë për të ndërprerë zinxhirin e transmetimit të infeksionit, për të parandaluar përhapjen e mëtejshme të COVID-19. Betejën me këtë sëmundje e kanë humbur deri tani 24 qytetarë.
Ndërkohë sot është rritur numri i të infektuarve me koronavirus në Shqipëri dhe në total janë 467 të infektuar dhe 24 viktima.
Ndërkohë, që nga sot është rritur edhe koha për të bërë pazaret, duke nisur nga ora 05:00 deri në 17:30 të gjithë kanë nga 90 minuta kohë për të përfunduar blerjet, ndërkohë që fundjava do të jetë sërish e mbyllur nga e premtja deri të hënën në mëngjes.
