Përballë temperaturave të larta që kanë përfshirë vendin, Ministria e Shëndetësisë i bën thirrje qytetarëve të tregojnë kujdes të shtuar për shëndetin, duke ndjekur disa masa mbrojtëse të domosdoshme kundër vapës.
Mjekët rekomandojnë që gjatë gjithë ditës të konsumohet ujë në mënyrë të rregullt, edhe kur nuk ndjehet etje, për të shmangur dehidratimin. Qytetarët këshillohen të qëndrojnë në ambiente të freskëta dhe të evitojnë ekspozimin në diell, veçanërisht në oraret më të nxehta, nga ora 11:00 deri në 16:00.
Për sa i përket ushqimit, preferohen vakte të lehta, të pasura me lëngje natyrale, si fruta dhe perime të freskëta. Një tjetër masë mbrojtëse është përdorimi i kremrave kundër rrezeve UV, si dhe veshja me rroba të lehta dhe me ngjyra të çelura, që ndihmojnë në ruajtjen e freskisë trupore.
Ministrja e Shëndetësisë theksoi se ekipet mjekësore janë në gatishmëri në terren për të ofruar ndihmën e nevojshme. Ajo u bëri thirrje qytetarëve që të kërkojnë ndihmë mjekësore në çdo rast nevoje.
