Ministri i Shëndetësisë së Kosovës, Arben Vitia ka bërë të ditur ditën e sotme se vendi ka mjaftueshëm vaksina kundër COVID-19. Gjithashtu ai ka bërë të ditur se mbrëmjen e djeshme në Kosovë ka arritur kontingjenti i ri prej 53 mijë doza të vaksinës Pfizer nga kontratat që kanë nënshkruar. Po ashtu ai ka bërë me dije se deri në fund të javës pritet të mbërrijnë edhe 150 mijë doza të tjera Astra Zeneca.
“Mbrëmë ashtu siç kemi paralajmëruar ka arritur kontingjenti prej 53 mijë vaksinave nga Pfizer nga kontrata e gjeneruar. Deri në fund të javës presim të arrijnë edhe 150 mijë doza tjera të AstraZenceas nga Gjermania”, tha Vitia.
Vitia ka shtuar se ditët në vazhdim nga kontrata që është nënshkruar me Pfizer do të vijnë edhe 622 mijë vaksina ku një pjesë e tyre ka arritur gjatë korrikut dhe gushtit. “Presim edhe arritjen e mbi 450 mijë dozave të Pfizer nga COVAX pjesë e donacionit nga SHBA. Kemi vaksina të mjaftueshme të Pfizer dhe AstraZeneca. Janë gjeneruar terminë të reja për tu vaksinuar”, ka thënë Vitia.
Po ashtu ai ika bërë sërish apel qytetarëve që të vaksinohen. “Mos zgjidhni se cilën vaksinë ta marrim në një situatë si kjo me rëndësi është që të vaksinohemi sa më parë”, u shpreh ministri. Vitia shtoi se së shpejti pritet të publikohet edhe lista e 1 mijë punonjësve të ri shëndetësorë.
