Ministri i Drejtësisë, Ulsi Manja, ka kërkuar nisjen e procedimit disiplinor ndaj prokurores së Shkodrës, Elsa Gjeli, duke e dërguar çështjen në Institutin e Lartë të Drejtësisë dhe në Këshillin e Lartë të Prokurorisë.
Ky reagim erdhi pas kryeministrit Edi Rama, i cili kritikoi ashpër prokuroren për mosfillimin e hetimeve ndaj ndërtimit pa leje të 10 kabinave në fshatin Theth.
Sipas Manjës, Elsa Gjeli ka shkelur rregullat ligjore duke u bazuar në një ligj të vjetër, të shfuqizuar prej kohësh, për të arsyetuar mosndërmarrjen e veprimeve. Në vend që të aplikonte ligjin nr. 20/2020, që rregullon përfundimin e proceseve kalimtare të pronësisë dhe ndërtimet në zona të mbrojtura, prokurorja ka përdorur ligjin nr. 9482, i cili nuk është më në fuqi. Kjo, sipas ministrit, tregon mungesë serioze në vlerësimin juridik të çështjes dhe në mbrojtjen e territorit dhe mjedisit.
Kjo situatë krijoi tensione të mëdha mes kryeministrit Rama dhe Prokurorisë së Shkodrës.
Rama ka denoncuar publikisht vonesën në hapjen e hetimeve dhe refuzimin e prokurores për të marrë në shqyrtim denoncimin e Policisë së Shtetit lidhur me ndërtimet në Theth. Në një postim në Facebook, Rama tha se është lejuar ndërtimi i këtyre kabinave në kundërshtim me ligjin dhe se prokurorja ka dalë në përfundimin se nuk ka elementë të vepër penale, duke e cilësuar këtë vendim të papranueshëm.
Ai paralajmëroi se çështja do të shkojë në Këshillin e Lartë të Drejtësisë dhe theksoi se prokurorja nuk meriton të paguhet si e tillë.
Ndërkohë, pronari i kabinave, Prekë Kodra, është një person në kërkim nga SPAK në lidhje me dosjen “Metamorfoza”.
Ai akuzohet për një seri ngjarjesh kriminale dhe njihet për planin e pretenduar për të vrarë kryeministrin e Kosovës, Albin Kurti, si dhe dy politikanë të tjerë, katër vite më parë.
Kabinat e ndërtuara nga Kodra në Theth, të njohura si “Vilat e Shqiponjave”, janë ngritur mbi struktura betoni në një zonë të mbrojtur nga shteti, duke shkaktuar shqetësim të madh për mbrojtjen e mjedisit dhe ligjshmërinë e ndërtimeve në zonë.
