Ministri i Brendshëm Ervin Hoxha është thirrur ditën e sotme me kërkesë të deputetëve të Partisë Demokratike të raportoj mbi ngjarje kriminale të regjistruara në verën e këtij viti. Hoxha e ka nisur fjalën e tij duke theksuar se nuk është i kënaqur me punën e Policisë së Shtetit, por nga ana tjetër ai tha se policia i ka përmirësuar standardet profesionale.
“Në fakt dua të bëj një parantezë duke thënë se jam këtu për të dhënë shpjegime në katër çështje. Kam ardhur t’ju informojë mbi veprimtarinë e Ministrit të Brendshëm. Nuk jam i kënaqur me Policinë e Shtetit. Unë ju siguroj se kam gjetur një polici profesionale. Në përgjigje të kërkesës tuaj doja të isha korrekt me ju, por një takim që lidhet me procesin e Berlinit, më detyroi ta shtyjë ardhjen sipas kërkesës tuaj. Nuk e kuptova sensin e kësaj urgjence se për çfarë është kërkuar kjo seancë. Atëherë bazuar në kërkesën e anëtarëve ju informoj si më poshtë. Ju kemi dërguar një raport me statistika dhe nuk e shoh të arsyeshme që ta lexojë të plotë. Do të ndalem vetëm në disa pika. Ne edhe këtë vit kemi pasur një numër të madh turistësh, ku është tejkaluar shifra 10 milionë turistë. Ne kemi patur zero probleme në raport me turistët e huaj. -tha Hoxha.
Ndërkohë gara për drejtorin e Përgjithshëm të Policisë ka sjellë që 4 nga 15 kandidatë janë skualifikuar. Lajmi është bërë i ditur nga ministri i Brendshëm, Ervin Hoxha.
Gjatë raportimit në komisionin e sigurisë Hoxha tha:
“Janë skualifikuar 4 kandidatura. Procedura e përzgjedhjes vijon”
Mësohet se u skualifikuan Sami Rasha, Shemsi Prençi, Ibrahim Disha e Hajrulla Xhivini, informon gazetari i Shqiptarja.com Sokol Dema. Ndërkohë vijon verifikimi për Adriatik Tafçiun, Altin Menën, Ardian Çipën e Lutfi Minxhozin, Gentjan Shehajn, Idajet Faskajn, Ilir Prodën, Skënder Hita, Neritan Nallbatin, Pëllumb Seferin dhe Rebani Jaupin.
Hoxha bëri dhe një bilanc për vetingun.
“Janë 35 efektivë në vetting, 33 kanë kaluar, 1 skualifikuar, 1 i larguar me dëshirë” tha Hoxha.
Në komisionit parlamentar për Sigurinë Kombëtare, po mbahet me kërkesë të deputetëve të Grupit Parlamentar të Partisë Demokratike, një seancë dëgjimore me ministrin e Punëve të Brendshme, Ervin Hoxha, mbi sigurinë në vend. I pyetur nga deputeti Ervin Salianji në lidhje me efektivët që sipas një urdhri të ish- ministrit Taulant Balla duhet të deklaronin nëse kanë përdorur ose jo aplikacionin SKY, ministri Hoxha u shpreh se kushdo që e ka përdorur, do të përballet me ligjin.
