Ministri i Brendshëm i Italisë, Matteo Piantedosi foli këtë të hënë në lidhje me hapjen e kampeve të refugjatëve në Shëngjin të Lezhës. Sipas tij, Italia do të hapë qendrat e saj për emigrantët në Shqipëri në tetor dhe nuk ka frikë nga apelimet nga rastet që do të përpunohen.
“Me qendrat e emigrantëve në Shqipëri do të fillojmë në tetor. Sigurisht që ka pasur një vonesë prej disa muajsh (fillimisht hapja ishte planifikuar për në majin e kaluar) ka pasur kontrolle normale, për shembull, se terreni duhet të përforcohej. Kjo është e gjitha”, tha ministri.
Për sa i përket rrezikut të apelimeve nga emigrantët e ndaluar në Shqipëri, Piantedosi tha se kësaj pike, shteti italian nuk i trembet.
“Ne nuk i trembemi sepse kjo është një rregullore me të cilën Italia parashikon një rregullore evropiane që do të hyjë në fuqi nga viti 2026. Do të ketë procedura të përshpejtuara kufitare me dëbime më të shpejta pa duke penguar të drejtën për azil”, tha ai. Ministri tha se kontestimet individuale do të trajtohen rast pas rasti. Kujtojmë se kampi i refugjatëve i vendosur në Shëngjin është gati për të pritur emigrantët e parë, ndërkohë që ai në Gjadër është duke u ndërtuar ende. Këto qendra të vendosura në Lezhë do të presin të paktën 36 mijë refugjatë çdo vit. Deklarata e ministrit Italian vjen në një kohë, kur sipas mediave britanike, edhe kryeministri anglez po mendon që të sjellë emigrantë në vendin tonë, duke kopjuar modelin ‘Meloni’
