Kryeministri i Kosovës, Ramush Haradinaj komentoi takimin e sotëm të Minishengenit Ballkanik me liderëve të Serbisë, Shqipërisë, Maqedonisë dhe Malit të Zi.
Haradinaj tha se Kosova nuk ka nevojë për një Minishengen me kryeqytet Serbinë, për sa kohë kjo e fundit nuk njeh pavarësinë dhe masakrën e Reçakut.
Sipas tij, e gjitha kjo po bëhet në mënyrë që Kosova të heqë taksën ndaj mallrave serbe.
I menjëhershëm ka qenë reagimi i kryeministrit Rama, i cili e ka quajtur Haradinajn gënjeshtar.
Sipas tij, Kosova nuk do të ketë asnjë detyrim në lidhje me heqjen e taksës.
Ndër të tjera Rama tha se qëndrimi i Shqipërisë për njohjen nga Serbia të pavarësisë së Kosovës, nuk ka ndryshuar.
“Ndërhyrje prej të padituri klasik që merret llokum dhe paraqitet mediatikisht. Si bëhet kjo, në çfarë forme bëhet? Nuk ka asnjë nyje detyruese kjo marrëveshje, Haradinaj është një gënjeshtar që gënjen sërish, nuk di nëse e bën nga padija, por se është gënjeshtar, pasi këtu nuk ka asnjë kusht apo detyrim. Kjo marrëveshje ka vetëm një qëllim, të zbatojë marrëveshjet e bëra më parë mes të gjitha vendeve. Unë dua që në këtë proces ne të fusim hap pas hapi edhe elementë të tjerë, që ka të bëjë me zhbllokimin e ngërçit për energjinë. Është një ngërç i madh, që nuk zgjidhet me sharje, fyerje. Kjo është një gënjeshtër, sepse nuk ka asnjë lloj detyrimi në këtë aspekt. Nëse Kosova hyn në këtë proces dhe thotë që marrëveshjen për lëvizjen e lirë për njerëzit, mallrat, kapitalet, unë nuk dua ta bëj me Serbinë, por me Maqedoninë e Veriut, nuk i thotë njeri gjë.Është një tym që ngrihet nga rrethi vicioz dhe rruga qorre, ku është sot politika në Kosovë, që shpresoj të jetë rezultat i një momenti paqartësie dhe të zgjidhet, kur të vijë qeveria e re, me të cilën do punojmë. Ne nuk kemi ndryshuar asgjë në raport me qëndrimin solid të palëkundur, që Serbia duhet të njohë Kosovën. Por, jeta e përditshme na mëson se ka plot gjëra të tjera që mund të bëhen, dhe duke bërë gjërat e reja lehtësohet edhe procesi tjetër”, deklaroi Rama.
