Mijëra besimtarë nga e gjithë Shqipëria kaluan natën pranë Kishës së Shna Ndout në Laç, për të kremtuar njërën nga ngjarjet më të rëndësishme shpirtërore të vitit.
Të mbledhur në prag të festës së Shën Antonit të Padovës, i njohur si shenjti i mrekullive, besimtarët e shndërruan kishën dhe zonën përreth saj në një vend lutjeje, reflektimi dhe falënderimi.
Pelegrinazhi tradicional që zhvillohet çdo të martë për 13 javë rresht, kulmon më 12 dhe 13 qershor, kur mijëra qytetarë marrin rrugën drejt malit për të kërkuar ndihmë hyjnore, për të bërë betime apo për të shprehur mirënjohjen e tyre për ndërhyrjen e Shna Ndout në jetët e tyre.
Në mbrëmjen e 12 qershorit, besimtarët, të pajisur me qirinj në duar, u drejtuan drejt kishës në një atmosferë solemniteti dhe shprese.
Me urimin “Na ndihmoftë”, ata ngjiten në këmbë malin drejt Kishës së Laçit dhe qëndrojnë aty gjatë gjithë natës. Për shumë prej tyre, ky udhëtim nuk është vetëm një akt besimi, por edhe një përvojë e thellë shpirtërore dhe kulturore.
Kremtimet përmbyllen më 13 qershor, të njohur si “dita e madhe”, në përkujtim të ditës kur Shën Antoni i Padovës kaloi në amshim, duke lënë pas një trashëgimi të fortë devocioni për besimtarët katolikë dhe më gjerë.
