Prokuroria e Posaçme Kundër Korrupsionit dhe Krimit të Organizuar ka përfunduar fazën e pretencës për dosjen “Metamorfoza 2”, duke kërkuar një total prej 69 vitesh burg për gjashtë të pandehur, të akuzuar për krime të rënda si trafikim droge dhe sigurim kushtesh për vrasje.
Në qendër të akuzave është Dedan Gjoni, ish-shef i krimeve në polici, i cili akuzohet për përfshirje në trafik ndërkombëtar të lëndëve narkotike dhe në planifikimin e vrasjes së vëllezërve Edmond dhe Arben Nela.
SPAK ka kërkuar për të një dënim prej 13 vitesh burg, që në rast të pranimit të gjykimit të shkurtuar, konvertohet në 8 vite e 4 muaj burg.
Të pandehurit e tjerë në këtë çështje janë Ismail Zeneli, Bujar Gërmizi, Adrian Cenaj, Besmir Murtati dhe Albert Prenga.
Të gjithë akuzohen si pjesë e një grupi të strukturuar kriminal, që ka organizuar trafik kokaine nga Amerika Latine drejt Europës dhe ka përgatitur vrasje me pagesë.
Pretenca e SPAK për secilin të pandehur:
• Ismail Zeneli – 15 vite burg / përfundim: 10 vite
• Dedan Gjoni – 13 vite burg / përfundim: 8 vite e 4 muaj
• Bujar Gërmizi – 10 vite burg / përfundim: 6 vite e 8 muaj
• Adrian Cenaj – 7 vite burg / përfundim: 4 vite e 8 muaj
• Besmir Murtati – 12 vite burg / përfundim: 8 vite
• Albert Prenga – 12 vite burg / përfundim: 8 vite
Në dosje përmendet gjithashtu përfshirja e ish-zyrtarit të lartë të policisë Erzen Breçani dhe ish-specialistes së Interpolit Jonida Babameto, por GJKKO shpalli moskompetencën për ta dhe çështja u transferua në Gjykatën e Tiranës.
Akte dhe akuza kryesore:
• Trafik ndërkombëtar i narkotikëve, në bashkëpunim në kuadër të një grupi të strukturuar kriminal
• Sigurimi i kushteve për kryerjen e vrasjes
• Pjesëmarrje në organizatë kriminale
• Shpërdorim detyre (në rastin e Dedan Gjonit)
SPAK pretendon se grupi kishte lidhje të drejtpërdrejta me organizata kriminale që veprojnë në trafikun e kokainës nga Amerika Latine në Europë, ndërsa për disa prej të pandehurve ka prova që lidhen me përgatitjen e atentateve të mbetura në tentativë.
