Seanca gjyqësore për dosjen “Metamorfoza”, në të cilën janë të përfshirë Pëllumb Gjoka dhe disa të dyshuar të tjerë, është shtyrë për t’u zhvilluar më 5 maj.
Çështja po shqyrtohet nga trupa gjyqësore e Gjykatës së Posaçme, e përbërë nga gjyqtaret Etleva Desa, Flora Hajredinaj dhe Irena Gjoka.
Shkak për shtyrjen u bë kërkesa e avokates së Edmond Prekës, e cila deklaroi se kishte nevojë të unifikonte qëndrimin me klientin e saj lidhur me aplikimin e gjykimit të shkurtuar.
Pëllumb Gjoka u arrestua në korrik të vitit 2023 si pjesë e një grupi të dyshuar kriminal, të përfshirë në vepra të rënda penale si vrasje dhe rrëmbime. Ai është pronar i kompanisë “Imperial Group”, e cila operon në sektorin e turizmit, lojërave të fatit dhe investimeve të tjera të mëdha në vend.
Në vitin 2021, kompania e tij mori nga qeveria shqiptare statusin e “investitorit strategjik” për projektin “Silver Sand Resort”, një projekt turistik ambicioz me një sipërfaqe prej 113 mijë metra katrorë, që përfshin ndërtimin e pallateve, vilave dhe hoteleve. Investimi i parashikuar për këtë projekt kap vlerën e 52 milionë eurove, një pjesë e të cilave do të mbulohej përmes parave të gjeneruara gjatë ndërtimit.
Hetimet ndaj Gjokës nisën pas ardhjes së një dosjeje nga autoritetet franceze. Ai dhe anëtarë të tjerë të grupit përballen me nëntë akuza të rënda penale, përfshirë vrasje, korrupsion aktiv dhe pastrim parash në kuadër të një organizate të strukturuar kriminale.
Ndërkohë, disa zyrtarë të arrestuar si pjesë e kësaj organizate akuzohen për korrupsion, nxjerrje të të dhënave sekrete dhe për ndihmë në realizimin e vrasjeve.
