Gjykata e Posaçme kundër Korrupsionit dhe Krimit të Organizuar pritet të zhvillojë sot, në orën 10:00, seancën për shqyrtimin e kërkesës së avokatëve të Ilir Metës, të cilët kërkojnë zëvendësimin e masës së sigurisë “arrest me burg”.
Sipas mbrojtjes, pas përfundimit të hetimeve dhe kalimit të dosjes për gjykim, nuk ekziston më rreziku që Meta të ndikojë apo të prishë provat.
Për këtë arsye, avokatët kërkojnë një masë më të butë sigurie dhe propozojnë që në vend të paraburgimit, ish-presidentit t’i bllokohet pasaporta, si masë për të garantuar qëndrimin e tij në territorin shqiptar.
Më 4 gusht, SPAK njoftoi zyrtarisht përmbylljen e hetimeve ndaj Metës dhe kalimin e dosjes në gjykatë. Ai akuzohet për tre vepra penale: korrupsion, pastrim parash dhe fshehje pasurie, akuza që lidhen me dy dosje të njohura, atë të lobimit të LSI në SHBA dhe aferën CEZ-DIA.
Ilir Meta ndodhet në paraburgim që prej 21 tetorit 2024, me vendim të GJKKO-së për masën “arrest në burg”.
