Presidenti Ilir Meta ka kritikuar partitë politike në Shqipëri, të cilët kanë nisur fushatën zgjedhore, ndonëse data e zgjedhjeve nuk është caktuar akoma, ndërkohë që sipas tij pandemia dhe borxhi publik po rriten.
Në një postim në Facebook, Meta e quan retorikën politike në distancë një tension artificial që largon vëmendjen nga çështje jetike. Ky reagim i presidentit vjen pasi PD dhe PS kanë ndezur “motorët” e fushatës.
REAGIMI:
Edhe pse zgjedhjet parlamentare të parakohshme në Maqedoninë e Veriut do mbahen vetëm pas pak ditësh, një atmosferë sigurie dhe demokracie mbizotëron falë pjekurisë të lidershipit politik në tërësi, por edhe funksionimit normal të institucioneve. Ndërsa fatkeqësisht te ne edhe pse nuk ka as datë zgjedhjesh ende në horizont kemi një tension artificial sikur zgjedhjet do jenë nesër. Ndërkohë që edhe pandemia është në rritje së bashku edhe me defiçitin dhe borxhin publik. Verbëria për mbajtjen apo marrjen me çdo çmim të pushtetit na ka bërë që të dukemi me fqinjin tonë lindor sikur u përkasim dy kontinenteve të largëta. Ndaj s’duhet humbur më asnjë minutë në përmbushjen e kushteve thelbësore për çeljen e negociatave në mënyrë që të ecim së bashku me fqinjët tanë drejt Bashkimit Europian. Përballimi i pandemisë dhe plotësimi i kushteve duhet të jenë dy objektivat madhore për të gjithë. E para mbron shëndetin dhe jetën e çdo qytetari, ndërsa e dyta shpëton të ardhmen europiane të vendit për të cilën të gjithë përbetohen me fjalë dhe programe. Koha për vepra të mira është tani!
Një ditë më parë kryeministri Edi Rama në mbledhje me kryebashkiakët paralajmëro zgjedhjet në 4 bashkitë e mbetura pa “kokë”. Ai theksoi se zgjedhjet e tjera do të zhvillohen më 2021. Ndërkohë PD ka nisur punën me përzgjedhjen e kandidatëve për deputetë.
