Ditën e sotme mësuesit në Kosovë kanë dalë në protestë ndërsa janë mbledhur para qeverisë. Në protestën ata po kërkojnë rritje të pagave dhe nënshkrimin e kontratës kolektive.
Protesta ka nisur në oborrin e Bibliotekës Kombëtare ku më pas u marshua drejt Ministrisë së Arsimit.
Për shkak të protestës së SBASHK është ndaluar qarkullimi i automjeteve në rrugën “Agim Ramadani”, afër Ministrisë së Arsimit.
Pasi u ndalën për disa minuta para Ministrisë së Arsimit, protestuesit po vazhdojnë të qëndrojnë edhe para Qeverisë së Kosovës.
Punëtorët e Arsimit po mbajnë pankarta “Ministre, duke qenë kundër Kontratës Kolektive, je kundër punëtorëve të arsimit”, “E shenjtë është puna e mësuesit në edukimin e brezave”, “Qeveria realizo kërkesat tona, parandalo veprimet e tjera sindikale”, etj.
Një ditë para protestës, ministrja e Arsimit, Arbërie Nagavci, ka pritur në një takim kryetarin e SBASHK-ut, Rrahman Jasharaj, dhe përfaqësues të tjerë të sindikatës. Gjatë këtij takimi u diskutuan tema që lidhen me nismat e ndërmarra së fundmi në arsimin parauniversitar, përfshirë temat e ngritura nga SBASHK-u.
