Në dosjen hetimore ndaj zv.kryeministres Belinda Balluku është zbardhur një komunikim që implikon drejtpërdrejt kryeministrin Edi Rama. Bëhet fjalë për një mesazh të dërguar nga Balluku drejt ish vartësit të saj Evis Berberi, ku ajo e informon se ka takuar biznesmenin Ramë Geci me kërkesë të kryeministrit.
Materialet janë pjesë e dosjes që SPAK i ka dorëzuar Kuvendit të Shqipërisë, ku është kërkuar autorizimi për arrestimin e zv.kryeministres. Sipas aktit të ekspertimit nr. 195, datë 26.09.2024, të aparatit celular “Blackberry”, model “BBF100-6”, të sekuestruar Evis Berberit, rezulton një komunikim i zhvilluar më datë 24.08.2021 në aplikacionin “Whatsapp”.
Në orën 13:49, Belinda Balluku i dërgon Evis Berberit mesazhin: “KM më kërkoi të takoj Ramë Gecin”. Menjëherë pas kësaj, në orën 13:51, Berberi i përgjigjet Ballukut në aplikacionin “Signal Private Messenger” me tekstin: “E kishte takuar sot. Të kaloj nga zyra se e takova para një ore në kantier, bëra një xhiro në gjithë unazën”.
Biseda vijon në orën 13:52, ku Balluku shkruan: “Jam në shpi peshk me pak fjalë, me një virozë”, ndërsa Berberi i përgjigjet: “Obobo”. Po në të njëjtën minutë, Balluku shton: “Në PR do e çojmë këtë, them unë. Sa është PR?”. Në orën 13:53, Berberi i kthen përgjigje: “15 ml, rreth diku te 10 ml euro pa TVSH, 15 miliardë lekë”.
SPAK sqaron se, në lidhje me këto komunikime, nga hetimi ka rezultuar se Autoriteti Rrugor Shqiptar, më datë 15.09.2021, ka bërë njoftimin për procedurën e prokurimit me objekt “Ndërtim rruga Porto Romano Durrës, Loti 3 (vazhdimi)”.
Në Buletinin nr. 167, datë 22.11.2021, të Agjencisë së Prokurimit Publik, rezulton se për këtë procedurë prokurimi është publikuar njoftimi mbi vlerësimin e ofertave të operatorëve ekonomikë, ku është kualifikuar oferta e paraqitur nga shoqëria “Geci” sh.p.k.
Referuar të dhënave të sistemit elektronik të prokurimit publik, si rezultat i shpalljes fituese të shoqërisë “Geci” sh.p.k., është lidhur kontrata ndërmjet Autoritetit Rrugor Shqiptar dhe kësaj shoqërie, me objekt “Ndërtim rruga Porto Romano Durrës, Loti 3 (vazhdimi)”.
Nga hetimi rezulton se shoqëria “Geci” sh.p.k. ka si ortak të vetëm dhe administrator shtetasin Ramë Geci.
